ریحام خان کے انکشاف نے عمران خان کو نئی مشکل میں ڈال دیا

اسلام آباد (ویب ڈیسک) ریحام خان کے ساتھ دو نکاح اور پھر اس بارے میں جھوٹ بولنے پر تحریک انصاف کے چیئرمین عمران خان کو نااہل قرار دلانے کیلئے الیکشن کمشن میں درخواست دائر کر دی گئی۔ جسٹس پارٹی کے سربراہ منصف اعوان کی طرف سے الیکشن کمشن میں دائردرخواست میں نکتہ اٹھایاگیاہے کہ عمران خان نے اپنے نکاح کے حوالے سے جھوٹ بولا ہے۔درخواست میں کہا گیا ہے کہ عمران خان نے ایک عورت سے شادی کی پھر اسے چھپایا اور بعد میں معاملہ میڈیا پر آنے کے بعد پھر سے اسی عورت کے ساتھ دکھاوے کا نکاح کیا۔ ایک عورت سے دو نکاح کرنے اور جھوٹ بولنے کے بارے میں اب متاثرہ خاتون اور نکاح خواں نے بھی میڈیا کے ذریعے تصدیق کر دی ہے۔ بار بار جھوٹ بولنے پر عمران خان آئین کے آرٹیکل62اور 63 پر پورا نہیں اترتے اس لئے وہ رکن پارلیمنٹ رہنے کے اہل نہیں رہے لہذا انھیں نااہل قرار دیا جائے۔